HEAD lines of My DAY ..

براك ... زعلان علي ... يعاملني بجفاء و قسوة غير طبيعية ... من بد اخواني ... فا كان لابد من التحري و السؤال

وكانت الصاعقة اللي لم تخطر على بال ... قال بكل حدة و غلظة ... انتي لا شيء الا الكلام ... ياااا اخي لماذا ؟؟ قال اين وعدك في ذاك الزمان ؟؟

لم اذكر ... هذه المرة ... رد حتى دون النظر الي ... قلتي لي يبت ايييز

A'z

نطلع طلعة الشطار ... و هديتي لعبة نينجا ... افااا عليك برووك ... نست اخيتك ... دنيا و مشاغل ... تنازل و ذكرني بس مو تحط بقلبك

الخلاصة اني انحجزت ... اليوم ... نروح بأمر مبروك من براك المزيون ... الى لاند مارك ... و طبعا طبعا

انا ما ادل ... بس احلى شي ... لما اضيع مع ياهل ... يكفي رسم ملامح التركيز ... و الثقة ثم الثقة ثم الثقة

درنا و حسنا و حسنا و درنا ... وصلت سيتي سنتر ... و انا بخريطتي الذهنية ... عبالي انه لاند مارك ... قلت شرايك نشوفه

نزلنا و دخلنا ... و كأن دخولنا كان الى الحدود بين دول اسيوية غير عربية ... مخلوطة مع عرب و أكراد

عاااالم منفصل و مستقل

في يومي هذا كله ... لاحظت ان الاشياء اللي تضايقني ... مضحكة

اكره ما علي ... المندوبات لاي منتج بالجمعيات ... اووووووووووووووووووووف ضيييييم و وجودهم ماله اي معنى

و اشين شي ... انها اطل بالسلة جانها سلة ... بالعربانة جانها عربانة ... انا قبل اتعاطف معاهم اوقف اسمع

اخر شي لي خلصت ...قلت والله اغراض البيت امي كاتبتهم و محددتهم بالاسم و الكمية فااا سوووري

الحين لا والله ... كل راااس عاااير فيه وحدة اذا مو ثنتين ... بس احتاج ابتسامتي الرايقة ... و رمشة سريعة من عيوني يعني انا مقدرة تعبكم

الموضوع الثاني ... اني اكره حولي كره العمى ... اسوء منطقة بالكويت من جميع النواحي ... زحمتها اربع و عشرين ساعة

كل شي فيها يسد النفس ... و يحطم الطموح ... و يقلب حبك للحياة الى رغبة بالموت ... استغفر الله

ما لقينا لعبته فااا ...الله سبحانه و تعالى امتحن صبري ... و رحنا هالحولي ... الصج الصج ... اربع مرات ابلع البجوة

لكن لقينا اللي يبيه ... و عجبني براك وايد ... احسه اكبر من عمره سم الله عليه ... يعني اقدر اقول اني استانست معاه

بقية المواضيع او النقاط

اشعر بنشوى الانتصار ... وقمة الفرح ... و الانجاز ... متى ؟

لما اعطي الحساب ... بالضبط ... يعني خمسة و ثلاثمية و اثنين و سبعين فلس

اطيــــــــــــــــــــــــــــــــــــــــــــــــــــــــــــــــــــــــــــــــــــــــــر لي كان مضبوط ... احس اني مينونة ساعات

بس مو على طول اسويها ... لما اكون هادية نفسيا ... و ماكو اي احد وراي

من اكثر الاشياء ... اللي ما تعجبني و تضايقني لان حلها بسيط جدا

لما استخدم اي اداة اكل او شرب برا البيت ... بلاستيك ... و ماتكون مغلفة

يعني ماكدونالدز تجاوزوا هالهفوة ... و اذا طلبتوا سنداي راح اتييكم القفشة بأبهى حلة

بالكلية ... لأني صحية ... احب اشرب عصيـــــــــــر ... المشكلة اني متعتي فيه ناقصة ... لانه العوااادة مصفوفة جذي ... ربي كما خلقتني

بس هم ... مو لهدرجة مريضة انا ... اسوي روحي جني ما شفت

الحلوو ان اخواني كبروا ... و شايليين روحهم بروحهم ... فا دوري اشرافي بحت ... مما ينقص المتعة في امومتي المبكرة

يعني امس ... عرس صديقتي ... قلت ماني رايحة ... و امي لزمت علي لانه عيب لازم اوجبها

طول ما انا استعد ... و اجهز نفسي ... بالروحه و الردة ... و انا بالي معاهم ... حسيت اني مو سنعة ... و لا كفو

الحين امج مأمنتج على اسرتها كااااملة ... اللي متعودين على الدل و الدلال ... ما ياكلون و لا يبدلون الا تحت عينها

لكن احساس القصور و تأنيب الضمير ... خف الحمدالله ... ابوي الله يخليه لنا ... قال انه الامن مستتب و مرت الاحداث بانسيابية

والله يا الغالية ... اني اشيل اهلج كلهم فوق راسي ... مو بس بيتج ... سامحيني اذا حسستهم انج غايبة

مكانج اكبر من انه اي شخص يسده ... لحقي علي فلم هندي كئيب ... اول ما دخلت البيت من الكلية ... ما لقيتج بالصالة

هلت الدموع ... و يا عين هلي ما خفيتي ... و على الاكل ... و العصر ... احبج يا اطيب قلب ... و اروع ام

لويتي مع براك اليوم ... لاني ادري ... لو انتي معاه ... جان وصلتي الخجفي بس نلاقي اللي يبيه ... ما بغيت اكسر بخاطره

لانج ما عمرج كسرتي بخاطري ... الله يردكم سالمين